Бўлимлар

Ҳадисшунослик

Бўлимда, муқаддис аждодларимизнинг ҳадисшунослик борасидаги меросини тиклаш, чуқур ўрганиш ва кенг жамоатчиликка етказиш, ҳадис тўпламларининг ўзбек тилидаги таржима ва шарҳларини тайёрлаш бўйича илмий изланишлар олиб борилади. Шунингдек, бўлим томонидан алломаларимиз асарларининг илмий-танқидий матнларини тайёрлаш, ҳадислар асосида диний ҳаёт билан боғлиқ масалаларни таҳлил қилиш соҳасида тадқиқотлар амалга оширилади.

Ислом тарихи ва фалсафаси
Бўлимда, аждодларимизнинг ислом тарихи со=асидаги бой илмий-назарий меросини тиклаш, таҳлил қилиш ва кенг жамоатчиликка етказиш, ислом тарихи ва фалсафасига оид манбаларнинг илмий-танқидий таржималарини тайёрлаш бўйича изланишлар олиб борилади. Жамиятда диний соҳада муаммолар келтириб чиқараётган масалаларни ҳанафий мазҳаби таълимоти доирасида яратилган диний-фалсафий асарлар асосида таҳлил қилиш устувор вазифалардан ҳисобланади

Қуръонни ўрганиш (тафсир)

Аждодларимизнинг Қуръоншунослик борасидаги бой диний, илмий-назарий меросини тиклаш, чуқур ўрганиш ва кенг жамоатчиликка етказиш, Қуръоннинг ўзбек тилидаги академик таржима ва тафсирларини тайёрлаш бўлимнинг асосий вазифаларидан ҳисобланади. Бўлим фаолиятида Қуръон оятлари ва уларнинг тафсирлари асосида диний ҳаёт билан боғлиқ масалаларни таҳлил қилиш, изоҳлаш ҳамда диний-экстремистик ғояларга раддиялар тайёрлашга ҳам алоҳида эътибор берилади.

Манбашунослик ва қўлёзмаларни ўрганиш

Аждодларимизнинг бой диний илмий-назарий меросини тиклаш, улар томонидан яратилган ва дунё кутубхоналарида сақланаётган манбаларни топиш, ўрганиш, таҳлил этиш ва кенг жамоатчиликка етказиш бўлимнинг асосий вазифалардан ҳисобланади. Айни пайтда, бўлим фаолиятида Ислом манбашунослигига оид қўлёзмаларни тавсифлаш, қўлёзмаларнинг электрон каталогларини ишлаб чиқишга ҳам алоҳида эътибор берилади.

Маънавият, маданият ва санъат

Ислом маданиятининг умуминсоний маданият ривожига қўшган ҳиссаси, халқимиз маданияти ва маънавиятида исломий қадриятларнинг ўрни ва аҳамиятини ўрганиш, уларнинг дунёвий қадриятлар билан соғлом уйғунлигини таъминлаш билан боғлиқ масалаларни таҳлил қилиш бўлимнинг асосий вазифаларидан ҳисобланади. Айни пайтда, бўлим фаолиятида фуқароларда диний бағрикенглик маданиятини тарбиялаш, дунёвийлик ва динийликнинг соғлом уйғунлигини таъминлаш борасида амалга оширилаётган ишлар, эришилган натижалар, аждодларимизнинг маданиятшунослик ва санъатшунослик соҳасида яратган асарларини чуқур ўрганиш, таҳлил этиш ҳамда кенг жамоатчиликка етказишга ҳам алоҳида эътибор берилади.

Шариат (ФИҚҲ)

Буюк фақиҳ уламоларимизнинг фиқҳшунослик борасидаги бой диний илмий-назарий меросини чуқур ўрганиш, республикамизда виждон эркинлигини таъминлаш соҳасида қабул қилинган меъёрий-ҳуқуқий ҳужжатларнинг ижроси юзасидан амалга оширилаётган ишларни таҳлил қилиш бўйича илмий изланишлар олиб борилади. Айни пайтда, диний ҳаётдаги ўзгариш, ҳанафий мазҳаби ҳамда амалдаги қонунчилик меъёрлари асосида таҳлил қилиниб, зарур таклиф-тавсиялар тайёрланади.

Экпедиция ва тақриз

Ислом тарихи, фалсафаси, ҳуқуқи, манбашунослиги ва маданиятига оид асарларни ўрганиш учун жойларга экспедициялар ташкил этиш ва уларнинг натижалари бўйича зарур таклиф-тавсияларни тайёрлаш, тўпланган манбалар ва материалларни экспертизадан ўтказиш ва уларга тақриз тайёрлаш бўлимнинг асосий вазифаларидан ҳисобланади. Айни пайтда, таълим тизими учун диншунослик, исломшунослик йўналишидаги дарсликлар, ўқув ва услубий қўлланмалар тайёрланади.