АКАДЕМИЯНИНГ ЕВРОПАДАГИ ЯНГИ ҲАМКОРИ

2659

Ўзбекистон халқаро ислом академиясига Германиядаги энг нуфузли олий ўқув юртларидан бири – Мюнстер  университети Ислом илоҳиёт маркази раҳбари Моханад Корхиде бошчилигидаги делегация ташриф буюрди.

Академия фаолияти билан яқиндан танишган меҳмонлар унга юқори баҳо берди. Германиялик меҳмон Моханад Корхиде Ўзбекистон мўътадил ва соф исломни ўрганиш мумкин бўлган маскан эканини ва академия билан ҳамкорлик қилиш истаги юқори эканини алоҳида таъкидлади.

Учрашув чоғида томонлар ўзаро англашув меморандумини имзолаш, докторант ва магистрантлар алмашинуви, академик алмашишни йўлга қўйиш, ҳамкорликда конференциялар ташкил қилиш, биргаликда тадқиқотлар олиб бориш, манбаларни рақамлаштириш масалаларини муҳокама қилдилар.

Ташриф давомида Мюнстер университети Ислом илоҳиёт маркази делегацияси вакиллари академия докторантлари ва магистрлари билан давра суҳбати ўтказди. Унда академия вакиллари Германиядаги таълим ва илмий тадқиқотлар услуби, жараёни, шакллари билан қизиқди.

Германиялик меҳмонлар Манбалар хазинаси фаолияти ва унда сақланаётган илмий мерос намуналари билан таништирилди.

Ўзбекистон халқаро ислом академияси
Матбуот хизмати